71 ýaşly aktýor Jeki Çan kinematografiýa goşan goşandy üçin Pardo alla Carriera baýragyna mynasyp boldy. Baýrak Lokarnoda (Şweýsariýada) her ýyl geçirilýän film festiwalynda gowşuryldy diýip, Deadline habar berýär.
Dabarada Çan eýýäm 64 ýyl bäri kino pudagynda zähmet çekýändigini belläp, tolgundyryjy söz sözledi. Ol öz ýaşlygynda kakasy bilen baglanyşykly bir wakany gürrüň berdi.
"Men 64 ýyl bäri kino pudagynda zähmet çekýärin. Ýadyma düşýär, 17 ýaşlarymdakam aşhanada oturyp, kakamyň günübilen nahar bişirişini synlaýardym. Birden ol yzyna öwrüldi-de: “Oglum, men 60 ýaşymda, ýöne henizem nahar taýýarlap bilýärin. A sen 60 ýaşyňda söweşip bilermiň?” diýdi. Men aljyrap, näme jogap berjegimi bilmän ýaýdandym. Ýöne şu gün size aýdyp bilerin: Men 71 ýaşymda we henizem söweşip bilýärin” diýip, aktýor aýdýar.
Çykyşdan soň muşdaklary ony gurşap aldylar, oňa dürli sowgatlary gowşurdylar.
Jeki Çan “Dykyn wagty” (“Час пик”), “Hudaýyň esbaplary” (“Доспехи бога”), “Serhoş ussat” (“Пьяный мастер”) we “Polisiýaly waka” (“Полицейская история”) filmlerindäki keşpleri bilen tanalýar. Tutuş karýerasynda 100-den gowrak filmde surata düşdi. Aktýor iň çylşyrymly tilsimleri dublýorsyz, özbaşdak ýerine ýetirýänligi bilen meşhurlyk gazandy.
