Ak tam ABŞ-nyň Prezidenti Donald Trampyň Parahatçylyk boýunça Nobel baýragyna hödürlenmegini goldan daşary ýurt Liderleriniň sanawyny çap etdi. Bu habar Ak tamyň resmi saýtynda, X sosial ulgamynda ýerleşdirildi.
Maglumatda aýdylmagyna görä, Trampyň dalaşgärligini Azerbaýjanyň Prezidenti Ilham Aliýew, Ermenistanyň Premýer-ministri Nikol Paşinýan, Kambojanyň Premýer-ministri Hun Sen, Gabonyň Prezidenti Braýs Oliwiýa Ngema, Ysraýylyň Premýer-ministri Benýamin Netanýahu, Pakistanyň hökümeti hem-de Ruandanyň daşary işler ministri Oliwiýe Nduhungirehe goldady.
Iýun aýynda Trampyň Nobel baýragyna hödürlenmegi baradaky teklibi respublikaçy kongresmen Baddi Karter öňe sürdi. Mundan öň bolsa, Pakistanyň hökümeti Hindistan bilen dawanyň diplomatik ýollar arkaly çözülmegine goşan goşandy üçin onuň dalaşgärligini maslahat beripdi.
