Google kompaniýasy ABŞ-nyň kwant tehnologiýalaryny goldamak boýunça federal maksatnamasyna gatnaşmazlyk kararyna geldi. Kompaniýa maliýeleşdiriş şertleriniň iş ýüzünde peýdaly boljak kwant kompýuteriniň döredilmegine bökdençlik bolup biljekdigi zerarly şeýle netijä gelnendigini mälim etdi.
Maksatnamanyň çäginde ABŞ-nyň Söwda ministrligi kwant hasaplamalarynyň dürli ugurlary boýunça işleýän dokuz sany kompaniýa 2 milliard dollardan gowrak serişde bölüp bermegi meýilleşdirýär. Gatnaşyjylaryň arasynda IBM, GlobalFoundries, Atom Computing, D-Wave, PsiQuantum ýaly iri kompaniýalar bar.
Bu serişdeleri almagyň bir şerti — döwlete kompaniýanyň dolandyryş hukugy bolmadyk azlyk paýyny (minoritar paýyny) bermekdir. Google-yň ýüz öwürmegine bu şertleriň haýsynyň sebäp bolandygy takyk aýdylmaýar.
Kompaniýa düýpli ylmy barlaglary goldamak, şeýle hem milli barlaghanalar we uniwersitetler bilen hyzmatdaşlyk etmek arkaly döwlet edaralary bilen bilelikdäki işlerini dowam etdirjekdigini bildirdi.
