Erkin göreş boýunça türkmen pälwany Alp Arslan Begenjow (79 kg çenli agram kategoriýasy) 20 ýaşa çenli türgenleriň arasynda göreş boýunça ýaşlar dünýä çempionatynyň dörtden bir finalyndan geçip bilmedi. Ýaryş 17 – 24-nji awgust aralygynda Bolgariýanyň Samokow şäherinde 650 türgeniň gatnaşmagynda geçirilýär.
Dörtden bir final göreşinde 19 ýaşly Begenjow Eýranyň wekili, Aziýanyň häzirki çempiony Mahdi Ýusefi bilen duşuşdy. Tutluşyga deň başlanandan we 1:1 hasapdan soň, Begenjow lukmançylyk arakesmesini aldy. Göreş dikeldilenden soň, ol garşydaşyndan güýç taýdan asgyn gelip başlady. Ýusefi artykmaçlygyny 6:1-e çenli artdyrdy, Begenjow bolsa tehniki usul bilen tapawudy 6:4-e çenli azaltdy. Ýöne türkmen pälwanyna üstünlik gazanmak başartmady we tutluşyk eýranly türgeniň ýeňmegi bilen tamamlandy.
Belläp geçsek, Begenjow bir ýyl ozal bu türgen bilen duşuşypdy. Şol tutluşykda türkmen pälwany ýeňiji boldy. Ýöne şondan bäri Ýusefi ulularyň arasynda Aziýa çempiony we 23 ýaşa çenli türgenleriň arasynda dünýä çempiony titullaryny alyp, uly üstünlik gazandy.
Çärýek finala çykmak üçin Begenjow iki garşydaşyny ýeňdi. Saýlama tapgyrynda bolgariýaly pälwan Iwan Andonowdan 11:0 hasabynda üstün çykdy. 1/8 finalda mongoliýaly pälwan Gan Erdene Baatarhuuny hem 11 bal artykmaçlygy bilen ýeňdi.
Mundan öň Begenjow ýaryşyň ýeňiji bolup biljek türgenleriniň biri hasaplanýardy. Ol 2024-nji ýylda Türkmenistanyň taryhynda 20 ýaşa çenli türgenleriň arasynda ilkinji dünýä çempiony boldy. Ispaniýanyň Pontewedra şäherinde geçirilen çempionatda ol 46:0 umumy hasaby bilen bäş ýeňiş gazandy.
Türkmenistanyň beýleki wekilleriniň hem dünýä çempionatyndaky çykyşy şowly tamamlanmady. Watan Annaorazow (74 kg) russiýaly Ismail Haniýewden 0:10 hasabynda, Orazmuhammet Hojalyýew (92 kg) azerbaýjanly Anar Jafarliden 2:3 hasabynda ýeňildi.
