16-njy awgustdan 17-nji awgusta geçilen gije (Aşgabat wagty bilen irden) Çikagodaky United Center arenasynda UFC 319 ýaryşy geçirildi. Onuň esasy wakasy günorta afrikaly Drikus dýu Plessi bilen BAE-niň wekili Hamzat Çimaýewiň arasynda orta agramda titul söweşi boldy.
Söweş tutuş bäş raund dowam edip, Çimaýewiň emin agzalarynyň biragyzdan karara gelmeginde ýeňiş gazanmagy bilen tamamlandy. Hamzat söweşiň dowamynda garşydaşyna 510 urgy urdy, Dýu Plessi – 56. Çimaýew jemi 21 minut 25 sekunt garşydaşyny parterde saklady.
Bu üstünligi netijesinde Hamzat orta agramda guramanyň täze çempiony boldy.
Söweşden soň indi Çimaýewiň hasabynda MMA-da 15 ýeňiş bar. Ol ýekeje gezek hem ýeňilmedi. Dýu Plessi üçin bu karýerasynda üçünji we UFC-de birinji ýeňlişi boldy. Onuň hasabynda 22 ýeňiş bar.
Agşamyň ýene bir esasy söweşinde britaniýaly ýarym ýeňil agramly söweşiji Leron Mýorfi amerikaly Aaron Piko bilen duşuşdy. Söweş birinji raundda tirsek urgusyndan soň göni nokaut arkaly Mýorfiniň möhletinden ir ýeňmegi bilen tamamlandy. Piko söweşe işjeň başlap, hatda Mýorfini setka gysdy. Ýöne ahyrynda urgyny sypdyryp, nokauta düşdi.
Piko üçin bu söweş UFC-de birinji boldy. Ol karýerasynda bäşinji ýeňlişine sezewar boldy, şeýle-de onuň 13 ýeňşi bar. Mýorfiniň hasabynda 17 ýeňiş bolup, karýerasynda ýekeje söweşde-de ýeňilmedi.
