Garyşyk söweş stiliniň türkmenistanly wekili Döwletjan Ýagşymyradow amerikaly Kori Andersona garşy rewanş almak mümkinçiligini gazandy. Ýarym agyr agramda PFL-iň çempionlyk guşagy üçin tutluşyk 2025-nji ýylyň 3-nji oktýabrynda Dubaýda geçiriler, diýip promouşeniň resmi saýtynda habar berilýär.
Anderson bilen Ýagşymyradowyň ilkinji duşuşygy 2021-nji ýylyň aprelinde Bellator 257 ýaryşynda boldy. Şol tutluşyk Andersonyň peýdasyna üçünji raundda tehniki nokaut bilen tamamlandy. Indi olar başga bir guramanyň çäginde duşuşarlar we bu gezek ýeňiji çempionlyk guşagyny alar.
36 ýaşly Döwletjan Ýagşymyradow soňky gezek 2024-nji ýylyň noýabrynda PFL ligasynyň ýaryşynda Impa Kasanganaýa garşy oktagona çykdy. Ol göreşi ilkinji raundda nokaut bilen ýeňdi. Döwletjanyň hasabynda 25 ýeňiş (şolaryň 18-i ýeňiji nokaut bilen), 7 ýeňliş we 1 deňlik bar. Ol häzir 7 ýeňişden ybarat tapgyrda barýar.
Anderson 35 ýaşynda. Ol UFC-niň öňki söweşçisi we PFL-iň çempionlyk guşagynyň häzirki eýesi. Soňky söweşini ol şu ýylyň iýulynda PFL ýaryşynda Günorta Afrikada russiýaly Denis Golsowa garşy geçirdi. Şol söweşde Kori ikinji raundda tehniki nokaut bilen ýeňdi. Onuň hasabynda 19 ýeňiş (şolaryň 9-sy nokaut bilen) we 6 ýeňliş bar, goşmaça bir göreş bolsa geçmedik diýlip hasaplanyldy. Ol häzir 3 ýeňişden ybarat tapgyrda barýar.
Anderson – Ýagşymyradow tutluşygy oktýabrdaky ýaryşyň ikinji esasy duşuşygy bolar. Ýaryşyň esasy tutluşygy russiýaly Usman Nurmagomedow bilen irlandiýaly Pol Hýuzyň arasynda geçiriler.
