Türkmenistana sapar bilen gelen Türkiýäniň Beýik Millet Mejlisiniň Başlygy Mustafa Şentop türkmen parlamentarileriniň öňünde çykyş etdi.
18-nji noýabrda Türkmenistanyň Milli Geňeşiniň Mejlisinde Türkiýe Respublikasynyň Beýik Millet Mejlisiniň Başlygy Mustafa Şentopyň ýolbaşçylygynda ýurdumyza sapar bilen gelen parlament wekiliýeti bilen duşuşyk geçirildi diýip, Anadolu agentligi habar berýär.
Türkmen Parlamentiniň komitetleriniň ýolbaşçylarynyň gatnaşmagynda Mejlisiň Başlygy G.Mämmedowa bilen geçirilen duşuşygyň barşynda kanunçykaryjylyk tejribesini alyşmak, şeýle hem iki ýurduň halklarynyň bähbidine parlamentara hyzmatdaşlygyň geljekki mümkinçilikleri ara alnyp maslahatlaşyldy.
Duşuşyga gatnaşyjylar dostlukly ýurduň parlament wekiliýetiniň Aşgabada saparynyň iki doganlyk döwletiň doly möçberli hyzmatdaşlygy ösdürmekde parlamentara gatnaşyklara aýratyn ähmiýet berilýändigine şaýatlyk edýändigi baradaky pikiri beýan etdiler.
Geçirilen duşuşykdan soňra Türkiýe Respublikasynyň Beýik Millet Mejlisiniň Başlygy Mustafa Şentop iki doganlyk ýurduň parlamentarileriniň öňünde çykyş etdi.
