2-nji noýabrda Gazagystan Respublikasynyň Prezidenti Kasym-Žomart Tokaýew «Türkmen-gazagystan döwlet serhediniň geçýän ugruny kesgitlemek we Hazar deňzindäki balyk tutulýan zolaklaryň ýanaşyk böleklerinde çäk çekmek hakynda Türkmenistan bilen Gazagystan Respublikasynyň arasyndaky Şertnamany tassyklamak hakynda» Kanuna gol çekdi. Bu möhüm döwletara ylalaşygyna gazak Lideriniň geçen ýylyň oktýabrynda Türkmenistana amala aşyran saparynyň çäklerinde gol çekilipdi.
Gazagystanyň Prezidentiniň akorda.kz resmi internet saýtyndaky habarda agzalan Şertnamanyň tassyklanylmagynyň ýerasty baýlyklary we suw-biologik serişdeleri peýdalanmak üçin özbaşdak hukuklary durmuşa geçirmäge, şeýle-de iki ýurduň arasyndaky goňşuçylyk gatnaşyklaryny giňeltmäge mümkinçilik berjekdigi nygtalýar.
Ýeri gelende bellesek, Prezident Serdar Berdimuhamedow şu ýylyň 17-nji aprelinde «Türkmen-gazagystan döwlet serhediniň geçýän ugruny kesgitlemek we Hazar deňzindäki balyk tutulýan zolaklaryň ýanaşyk böleklerinde çäk çekmek hakynda Türkmenistan bilen Gazagystan Respublikasynyň arasyndaky Şertnamany tassyklamak hakynda» Türkmenistanyň Kanunyna gol çekipdi.
