Prezident Serdar Berdimuhamedow Türkmenistanyň halkynyň we Hökümetiniň adyndan, şeýle-de hut öz adyndan Ermenistan Respublikasynyň Prezidenti Waagn Haçaturýana we Premýer-ministr Nikol Paşinýana hem-de ýurduň ähli halkyna Türkmenistan bilen Ermenistan Respublikasynyň arasynda diplomatik gatnaşyklaryň ýola goýulmagynyň 30 ýyllygy mynasybetli tüýs ýürekden gutlaglaryny, iň gowy arzuwlaryny iberdi.
Döwlet Baştutany gutlag hatynda ýurtlarymyzyň arasyndaky gatnaşyklaryň, birek-birege hormat goýmaga, deňhukuklylyga, özara ynanyşmaga esaslanýandygyny belläp, Türkmenistanyň ikitaraplaýyn hyzmatdaşlygyň giňeldilmegine gyzyklanma bildirýändigini nygtady we döwletlerimiziň arasyndaky gatnaşyklaryň bilelikdäki tagallalaryň netijesinde mundan beýläk-de ösdüriljekdigine ynam bildirdi.
Ýeri gelende bellesek, ermeni we türkmen halklarynyň arasyndaky dostlukly gatnaşyklaryň uzyn taryhy bar. Garaşsyzlykdan soňky 30 ýylyň içinde ol hil taýdan täze derejä ― döwletara gatnaşyklar derejesine göterilip, özara hormat goýmak we ynanyşmak esasynda işjeň ösmegini dowam edýär. Ermenistan bilen Türkmenistanyň arasyndaky ykdysady hyzmatdaşlyk ikitaraplaýyn gün tertibiniň möhüm bölekleriniň biri hasaplanýar. 2009-njy ýyldan bäri Ykdysady hyzmatdaşlyk boýunça hökümetara ermeni-türkmen toparynyň mejlisleriniň 9-sy geçirilip, olarda söwda-ykdysady, ylmy-tehniki, medeni-ynsanperwer we beýleki ulgamlarda ermeni-türkmen hyzmatdaşlygyny ösdürmegiň ugurlary kesgitlenildi.
