4-nji oktýabrda Türkmenistanyň Daşary işler ministrliginde daşary işler ministri Raşid Meredowyň Ýaponiýanyň Türkmenistandaky Adatdan daşary we Doly ygtyýarly ilçisi Hiroýuki Ýamamoto bilen duşuşygy geçirildi. Onda şu ýylyň ahyrynda Tokio şäherinde Ykdysady hyzmatdaşlyk boýunça türkmen-ýapon komitetiniň 14-nji mejlisini geçirmek meselesi ara alnyp maslahatlaşyldy. Bu barada TDIM-niň Metbugat gullugy habar berýär.
Diplomatlar duşuşygyň dowamynda türkmen-ýapon hyzmatdaşlygynyň köp sanly meselelerini ara alyp maslahatlaşdylar. Raşid Meredow Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň Ýaponiýa amala aşyran iş saparyny ýokary derejede guramakda beren goldawlary üçin ýapon tarapyna minnetdarlyk bildirdi.
Ýaponiýanyň Türkmenistanyň maýa goýum we bank ulgamynda möhüm hyzmatdaşy bolup durýandygy, şoňa görä-de, öňdebaryjy ýapon banklary we kompaniýalary bilen ýakyn hyzmatdaşlykda maýa goýum işlerini güýçlendirmeginiň maksadalaýyk boljakdygy nygtaldy. Şu nukdaýnazardan, şu ýylyň ahyrynda Tokio şäherinde Ykdysady hyzmatdaşlyk boýunça türkmen-ýapon komitetiniň 14-nji mejlisini guramak meselesi ara alnyp maslahatlaşyldy.
Şeýle-de diplomatlar Türkmenistan bilen Ýaponiýanyň arasyndaky diplomatik gatnaşyklaryň ýola goýulmagynyň 30 ýyllygyna bagyşlap, birnäçe medeni ähmiýetli çäreleri geçirmek meselelerine seretdiler.
