7-nji sentýabrda Saud Arabystany Patyşalygynyň Er-Riýad şäherinde Türkmenistanyň daşary işler ministri R.Meredow “Aýlagdaky Arap döwletleriniň – Merkezi Aziýanyň Hyzmatdaşlyk geňeşiniň” daşary işler ministrleriniň strategik dialogynyň birinji duşuşygyna gatnaşdy.
TDIM-niň Metbugat gullugynyň berýän habaryna görä, duşuşyga gatnaşyjylar halkara gün tertibiniň möhüm ugurlaryny, sebit howpsuzlygy meselelerini we söwda, ykdysadyýet, maýa goýum, medeniýet we ylym pudaklarynda geljekde netijeli gatnaşyklary we hyzmatdaşlygy ýola goýmak üçin geljekki ädimleri ara alyp maslahatlaşdylar.
Türkmenistanyň Daşary işler ministrliginiň ýolbaşçysy öz çykyşynda: “Şu gezekki mejlise Türkmenistan tarapyndan Merkezi Aziýa döwletleri bilen Aýlagdaky Arap döwletleriniň Hyzmatdaşlyk geňeşiniň arasynda giň gerimli özara gatnaşyklary döretmek üçin ilkinji möhüm ädim hökmünde garalýar” diýip nygtady.
Duşuşygyň jemleri boýunça taraplar Bilelikdäki Beýannamany, şeýle hem Söwda, maýa goýum, bilim, saglygy goraýyş, medeniýet we sport ugurlary boýunça amaly hyzmatdaşlygy ýola goýmaga gönükdirilen 2023-2027-nji ýyllar üçin Hereketleriň bilelikdäki meýilnamasyny kabul etdiler.
Türkmenistanyň daşary işler ministriniň Saud Arabystany Patyşalygyna sapary dowam edýär. Saparyň çäklerinde türkmen wekiliýetiniň daşary ýurtly hyzmatdaşlar bilen birnäçe ikitaraplaýyn duşuşyklary meýilleşdirilýär.
