Ahal welaýatynyň täze edara ediş merkeziniň häkimi wezipesine Şamuhammet Durdylyýew bellenildi. Bu barada degişli resminama Prezident Serdar Berdimuhamedow penşenbe güni täze sebit merkeziniň gurluşygyna baryp görmeginiň çäklerinde gol çekdi.
Serdar Berdimuhamedow bu ýerde Hökümetiň göçme mejlisini geçirdi we Durdylyýewi wezipä bellemek hakynda resminama gol çekdi.
Şamuhammet Durdylyýew gurluşyk ulgamyna ýolbaşçylyk etmekde we şäher dolandyrylyşynda baý tejribä eýe. Hünäri boýunça inžener-gurluşykçy bolan Durdylyýew ussadan başlap, gurluşyk we senagat ministri wezipesine çenli bardy. Iki gezek gurluşyk boýunça wise-premýer, Aşgabat şäheriniň häkimi, Prezidentiň Diwanynyň iş dolandyryjysy bolup işledi. 2021-nji ýylyň iýulynda «Aşgabat-Siti» gurluşyk kärhanalarynyň direksiýasynyň ýolbaşçysy wezipesine bellenilipdi.
