Prezident Serdar Berdimuhamedow 23-24-nji aprelde Kumamoto şäherinde geçiriljek dördünji Aziýa — Ýuwaş umman Suw sammitine gatnaşmaga Ýaponiýanyň Hökümetinden çakylyk aldy. Bu barada Türkmenistanyň Prezident bilen Ýaponiýanyň Premýer-ministri Fumio Kisidanyň arasynda 13-nji aprelde bolan telefon arkaly söhbetdeşlikde nygtaldy.
Hususan-da, sammite çakylyk üçin Ýaponiýanyň Hökümet Baştutanyna minnetdarlyk bildirip, Serdar Berdimuhamedow häzirki wagtda suw serişdeleriniň tygşytly hem-de netijeli peýdalanylmagynyň durnukly ösüşiň esasy kepili bolup durýandygyny nygtady. Suw meselesi halkara bileleşigiň öňünde durýan möhüm meseleleriň biridir, onuň oňyn çözülmegi ähli ýurtlaryň tagallalarynyň birleşdirilmegini talap edýär diýip, döwlet Baştutany belledi.
Ýeri gelende aýtsak, söhbetdeşligiň dowamynda söwda-ykdysady ulgamda üstünlikli ösdürilýän döwletara hyzmatdaşlygyň netijeli häsiýeti bellenildi. Köp ýyllaryň dowamynda iri ýapon kompaniýalarynyň Türkmenistanyň ykdysadyýetiniň dürli ulgamlarynda, ýurdumyzy durmuş-ykdysady taýdan ösdürmegiň maksatnamalarynda öňde goýlan wezipeleriň amala aşyrylmagyna uly goşant goşýandyklary nygtaldy.
