Türkmenbaşy şäherinde gurlan 400 orunlyk köpugurly hassahananyň gurluşygy doly tamamlanandy we toplumyň açylyş dabarasyna taýýarlyk görülýär. Bu barada 8-nji aprelde geçirilen Hökümet mejlisinde Balkan welaýatynyň häkimi T.Atahallyýew hasabat berip, dabaraly çäre mynasybetli işlenip taýýarlanylan medeni maksatnama barada durup geçdi.
Prezident Serdar Berdimuhamedow hasabaty diňläp, ýurdumyzyň ähli künjeklerinde bolşy ýaly, Balkan welaýatynda hem gurulýan durmuş maksatly binalaryň, şol sanda Türkmenbaşy şäherinde gurluşygy tamamlanan köpugurly hassahananyň ähmiýeti barada aýdyp, täze toplumyň açylyş dabarasyny guramaçylykly geçirmek, meýilleşdirilen çäreleriň ýatda galyjy wakalara beslenmegini üpjün etmek babatda häkime hem-de beýleki degişli ýolbaşçylara birnäçe tabşyryklary berdi.
Şeýle-de häkim şu ýyl Balkan welaýatynda geçiriljek Türkmen bedewiniň milli baýramyna görülýän taýýarlyk işleri we onuň medeni maksatnamasy barada giňişleýin maglumat berdi.
