14-nji fewralda Prezident Gurbanguly Berdimuhamedow Gazagystan Respublikasynyň Prezidenti Kasym-Žomart Tokaýew bilen telefon arkaly söhbetdeş boldy. Onuň dowamynda gazak Lideri Prezident Gurbanguly Berdimuhamedowyň 12-nji martda Türkmenistanda nobatdan daşary Prezident saýlawlaryny geçirmek baradaky çözgüdini goldaýandygyny aýtdy.
Gazagystanyň Prezidentiniň Metbugat gullugynyň ýazmagyna görä, Prezident Kasym-Žomart Tokaýew Prezident Gurbanguly Berdimuhamedowyň wagtyndan ir prezident saýlawlaryny geçirmek baradaky çözgüdini goldaýar. Gazak Lideriniň pikirine görä, Türkmenistanyň Prezidentiniň ägirt uly syýasy we durmuş tejribesi, şübhesiz, bu döwletiň gülläp ösmegine sebäp bolar.
Telefon arkaly söhbetdeşlikde taraplar ikitaraplaýyn gatnaşyklary mundan beýläk-de pugtalandyrmagyň geljegini, şol sanda Kasym-Žomart Tokaýewiň geçen ýylyň oktýabrynda Türkmenistana amala aşyran döwlet saparynyň çäklerinde gazanylan ylalaşyklaryň ýerine ýetirilişini ara alyp maslahatlaşdylar. Şeýle-de dostlukly ýurtlaryň Liderleri söwda, ykdysady, maýa goýumlar, medeni-ynsanperwer gatnaşyklary has-da giňeltmäge gyzyklanma bildirdiler.
