Türkmenistanda Halkara pediatriýa merkezi hem-de Aşgabatda ýene-de bir Stomatologiýa merkezi gurlar. Bu baradaky teklibi 8-nji fewralda geçirilen iş maslahatynyň dowamynda Prezident Gurbanguly Berdimuhamedow beýan etdi we wise-premýer S.Toýlyýewe bu meseleleri düýpli öwrenmegi tabşyrdy.
Türkmen Lideri iş maslahatynyň dowamynda “Saglyk” Döwlet maksatnamasyndaky bellenilen wezipeleriň yzygiderli durmuşa geçirilmeginiň, saglygy goraýyş ulgamyna degişli zerur hasaplanýan desgalary gurmagy dowam etmegiň wajypdygyna aýratyn ünsi çekdi.
Şeýle-de wise-premýer S.Toýlyýew Hytaý Halk Respublikasyna bolan iş saparyň barşynda Türkmenistanyň Prezidentiniň we HHR-iň Başlygynyň arasynda ýokary derejede geçirilen gepleşikleriň netijeleri boýunça Hytaýdan 5 million sany waksinanyň Türkmenistana berlendigi üçin döwlet Baştutanyna hoşallyk bildirdi.
