11-nji aprelde Aşgabatda Ýewropa gününe bagyşlanyp, dürli aralyklara köpçülikleýin inklýuziw ylgaw ýaryşy geçiriler.
Çäre Ýewropa Bileleşiginiň Türkmenistandaky wekilhanasy tarapyndan Türkmenistanyň Bedenterbiýe we sport baradaky döwlet komiteti hem-de Aşgabat şäher häkimligi bilen bilelikde, şeýle-de Run-Rush jemgyýetçilik hereketiniň goldaw bermeginde guralýar.
Ylgaw ýaryşynyň ähli ugurlary Garaşsyzlyk seýilgähiniň töweregi boýunça bolar. Gatnaşyjylar 2, 5 we 10 kilometrlik aralyklary saýlap biler. 2 kilometrlik ylgawa uly adamlaryň ugratmagynda 16 ýaşyna çenli çagalar, 5 we 10 kilometrlik aralyklara bolsa 16 ýaşyndaky we ondan uly bolan gatnaşyjylar goýberiler.
Guramaçylaryň habarynda: «Siz tejribeli ylgawçy bolsaňyzam ýa-da diňe dostlaryňyz we maşgalaňyz bilen işjeň hem-de şatlykly säheri geçirmek isleseňizem, bu çäre dostluk ruhunda jemlenmek üçin ajaýyp mümkinçilikdir» – diýlip bellenilýär.
Ýeňijilere we işjeň gatnaşyjylara baýraklar hem-de ýadygärlik sowgatlary gowşurylar. Deslapky oflaýn hasaba alyş işleri 7-8-nji aprelde sagat 16:00-dan 20:00-a çenli Aşgabadyň «Hiroo» kofehanasynda (9-njy etrapça) we Magtymguly şaýolundaky 150-nji jaýda ýerleşýän zoo-dükanynda geçiriler. Gatnaşmak üçin şahsyýeti tassyklaýan resminamany görkezmek zerurdyr.
Guramaçylar ähli isleg bildirýänleri bu çärä goşulmaga hem-de Ýewropa gününi agzybirlik we dostluk ruhunda bellemäge çagyrýar.
