BMG-niň Aşgabatdaky binasynda Bütindünýä inçekesele garşy göreş gününe bagyşlanan ylmy-amaly okuw maslahaty geçirildi.
Çäräni BSGG-niň Türkmenistandaky ýurt boýunça edarasy gurady. Maslahatyň esasy mowzugy 2030-njy ýyla çenli inçekeseli ýok etmek baradaky maksada ýetmek üçin görülmeli çäreleri ara alyp maslahatlaşmak boldy.
Gatnaşyjylar 2026–2030-njy ýyllar üçin Milli strategiýa geçmek meselelerine, şeýle hem «Inçekeselsiz Merkezi Aziýa» başlangyjyny durmuşa geçirmäge degişli meselelere seretdi. Keseliň dermanlara durnukly görnüşlerine garşy göreşmäge aýratyn üns berildi.
Şeýle hem AIW-iň we wirusly gepatitleriň öňüni almak, şol sanda ýokançlaryň eneden çaga geçmeginiň öňüni almak boýunça çäreler maslahatlaşyldy.
Okuw maslahatynyň ikinji bölüminde hünärmenler keseli wagtynda anyklamagyň häzirkizaman usullaryna, täze sanjymlara we utgaşan ýokançlary bejermegiň ýollaryna seretdi.
Çärä halkara guramalaryň wekilleri, şol sanda BMG-niň Ösüş Maksatnamasynyň, BMG-niň Ilat Gaznasynyň we Milli Gyzyl Ýarymaý jemgyýetiniň wekilleri gatnaşdy.
Duşuşygyň netijeleri boýunça geljekki bilelikdäki işleriň ileri tutulýan ugurlary kesgitlenildi.
