Türkmenistanyň Hökümeti tarapyndan satyn alnan «Sputnik Laýt» sanjymynyň nobatdaky tapgyry anna güni Moskwadan Türkmenabadyň Halkara howa menziline gelip gowuşdy.
Russiýa Federasiýasynyň Türkmenistandaky Ilçihanasynyň saýtynda habar bermeklerine görä, ýük S7 awiakompaniýasynyň Moskwa-Türkmenabat-Moskwa ýörite uçuşy bilen getirildi. Belläp geçsek, bu gatnaw arkaly 198 adam Türkmenistandan Russiýa äkidildi. Bu ýörite uçuş hasap boýunça 34-nji uçuşdyr.
Türkmenistanyň Saglygy goraýyş we derman senagaty ministrligi 2021-nji ýylyň dekabrynda «Sputnik Laýt» sanjymyny bellige aldy. 10 müň doza sanjymdan ybarat bolan ilkinji tapgyr şol aýyň içinde ýurdumyza getirildi.
