18-nji ýanwarda Halkara ahalteke atçylyk toplumynda täze dünýä inen taýçanagy göreninden soň, Prezident Gurbanguly Berdimuhamedow Ahal welaýatynyň täze edara ediş merkezine geldi we bu ýerde tamamlaýjy tapgyrda alnyp barylýan gurluşyk işleriniň ýagdaýy bilen gyzyklandy.
Bu ýerde türkmen Liderine edara ediş merkeziniň çäginde gurjak desgalaryň täze şekil taslamalary we çyzgylary görkezildi. Olaryň hatarynda çagalar baglary, inzener ulgamlary, myhmanhana we söwda merkezi bar.
Wise-premýer Ç.Gylyjow türkmen Liderine Ahal welaýatynyň täze edara ediş merkezinde türkmen telekeçileri tarapyndan alnyp barylýan gurluşyk işleri barada hasabat berip, döwlet Baştutanyndan Aşgabat — Türkmenabat ýokary tizlikli awtomobil ýolunyň Tejen — Mary böleginde guruljak gurluşyklara badalga bermegini sorady.
Soňra Prezident Gurbanguly Berdimuhamedow bu ýerde degişli ýolbaşçylaryň we Ahal welaýatynyň täze edara ediş merkezinde gurluşyklary alyp barýan potratçylaryň ýolbaşçylarynyň gatnaşmagynda iş maslahatyny geçirdi. Türkmen Lideri bu ýerde atçylyk boýunça ýokary okuw mekdebiniň hem gurulýandygyny belläp, wise-premýer E.Orazgeldiýewe milli ahalteke atçylygyny ösdürmek boýunça, gerek bolsa, Döwlet býujetinden daşary hem serişdeleri goýbermegiň zerurdygyny nygtady.
Täze edara merkezindäki gurluşyklara gatnaşýan hususy kärhanalaryň käbiriniň ýolbaşçylarynyň hasabatlaryny diňläp, türkmen Lideri bu ýerde iň häzirki zaman inženerçilik çözgütleriniň, sanly ulgamyň ornaşdyrylmagynyň, amatly ekologiýa ýagdaýynyň döredilmeginiň esasy talaplar bolup durýandygyny nygtady.
