Hindistanda COVID-19 bilen keselleme ýagdaýynyň artýanlygy zerarly, ýurduň Häkimiýeti bäş sany Merkezi Aziýa döwletleriniň Baştutanlaryny dabaraly ýörişe hormatly myhmanlar hökmünde çagyrmak hem-de premýer-ministr Narendra Modi bilen ýokary derejede duşuşyklary guramak meýilnamalaryny yza süýşürmek mümkinçiliklerine garaýar. Bu barada The Hindu neşiri habar berýär.
Gazetde bellenilişine görä, adatdan daşary ýagdaýlar hem-de Respublikanyň güni mynasybetli ýörişe gatnaşyjylaryň, onuň geçjek ugrunyň, şeýle hem tomaşaçylaryň sanynyň çäklendirilmegi bboýunça meýilnamalar Modiniň ýolbaşçylygynda şenbe güni geçirilen ýygnakda maslahatlaşyldy.
26-njy ýanwara meýilleşdirilen çäräni guraýan resmi adamlaryň aýtmagyna görä, Gazagystanyň, Gyrgyzystanyň, Täjigistanyň, Türkmenistanyň we Özbegistanyň Liderlerine eger-de pandemiýa bilen bagly ýagdaýlar gowşamasa, smmite wideomaslahat görnüşinde gatnaşmaga teklip iberildi.
Merkezi Aziýa döwletleriniň Prezidentleri — Tokaýew, Japarow, Rahmon, Berdimuhamedow we Mirziýoýew — 25-nji ýanwarda Delide Hindistan — Merkezi Aziýa sammitine gatnaşmalydy. Döwlet Baştutanlary dekabr aýynda baýramçylyk çäresine we sammite gatnaşjakdyklaryny tassykladylar.
Hindistanyň resmi wekilleriniň beýan etmegine görä, eger-de adatdan daşary ýagdaýlar üçin meýilnama güýje girse, onda sammit tertibe laýyklykda, ýöne wideomaslahat görnüşinde geçiriler.
