10-njy ýanwarda Ministrler Kabinetiniň Başlygynyň käbir orunbasarlarynyň hem-de Aşgabat şäheriniň we welaýatlaryň häkimleriniň gatnaşmagynda sanly ulgam arkaly geçirilen iş maslahatynda Prezident Gurbanguly Berdimuhamedow koronawirusyň ýaýramagyna garşy ýurtda alnyp barylýan çärelere aýratyn ünsi çekdi.
Wise-premýer, Türkmenistanda Kesellere garşy göreşýän adatdan daşary toparyň başlygy S.Toýlyýew hasabatynda koronawirusyň «omikron» atly täze görnüşiniň ýüze çykarylandygyny, onuň ýurdumyz bilen serhetleşýän goňşy döwletlerde epidemiologik ýagdaýy döredýändigini belläp, Türkmenistanda durnukly saglyk abadançylygyny mundan beýläk-de gorap saklamak, ýurdumyzyň çäklerine bu ýokanjyň aralaşmagynyň öňüni almak boýunça yzygiderli işleriň dowam edýändigini habar berdi.
Türkmen Lideri adatdan daşary ýagdaýlar sebäpli emele gelýän töwekgelçilikleriň täsirini peseltmäge, adamlaryň saglygyny goramaga gönükdirilen toplumlaýyn çäreleriň geçirilmelidigine ünsi çekip, bu keseliň ýurdumyzyň çägine ýaýramagynyň öňüni almak üçin zerur çäreleriň görlendigini, waksinalaryň satyn alnyp, häzirki döwürde-de ilata sanjym geçirilýändigini nygtap, bu meselede arkaýynçylyga ýol berilmeli däldigini belledi. Çünki soňky günlerde sebitde koronawirusyň «omikron» görnüşi ýüze çykaryldy. Geçirilýän çäreleriň oňyn netijeleri bermegi üçin bu çäre adamlaryň ýaşyna görä geçirilmelidir diýip, döwlet Baştutany nygtady.
