Türkmenistan Täjigistanyň Garaşsyz Döwletleriň Arkalaşygyna agza ýurtlaryň arasynda söwda dolanyşygynyň möçberini görnetin artdyran döwletleriniň hatarynda birinji orny eýeledi. Bu barada Täjigistanyň Ykdysady ösüş we söwda ministrliginde berlen maglumata salgylanyp, orient.tm habar berýär.
Tj.sputniknews saýtynyň habar bermegine görä, Türkmenistanyň we Täjigistanyň arasyndaky söwda dolanyşygynyň möçberi 2,5 esse ýokarlandy. Bilermenler munuň geçen ýylyň awgust aýynda Türkmenistanyň we Täjigistanyň Prezidentleriniň arasynda geçirilen gepleşikleriň netijesi bilen baglydygyny nygtaýarlar.
Şol sanda iki ýurduň Hökümetiniň arasynda maliýe, ykdysady, söwda we senagat ulgamynlarynda hyzmatdaşlyk hakynda resminamalaryň birnäçesine gol çekildi. Olaryň hatarynda Türkmenistanda we Täjigistanda iki ýurduň Söwda öýlerini açmak, söwda-ykdysady hyzmatdaşlyk boýunça Maksatnama, 2021 — 2023-nji ýyllarda söwda dolanyşygynyň möçberini artdyrmagyň «Ýol kartasy», iki ýurduň Söwda-senagat edaralarynyň arasynda Işewürlik geňeşini döretmek hakynda Ylalaşyk bar.
