Wise-premýer, Türkmenistanyň Daşary işler ministri Raşid Meredow Owganystanyň wagtlaýyn Ministrler kabinetiniň başlygynyň orunbasary Abdul Salam Hanafi bilen wideo baglanyşyk arkaly gepleşik geçirdi. TASS-yň habaryna görä, bu barada «Taliban» hereketiniň wekili Muhammet Naim duşenbe güni özüniň Twitter sahypasynda habar berdi.
«Mawlawi Abdul Salam Hanafi goňşy Türkmenistana minnetdarlyk bildirdi we Owganystanyň özara gyzyklanma bildirýän meseleler boýunça ikitaraplaýyn gatnaşyklary ösdürmek ugrunda hyzmatdaşlyga ygrarlydygyny tassyklady» –diýlip habarda aýdylýar.
Türkmenistanyň daşary syýasat edarasynyň ýolbaşçysy Hanafini Owganystanyň täze hökümetiniň saýlanmagy bilen gutlady we resmi Aşgabadyň «ýurtlaryň arasynda dostluk we doganlyk gatnaşyklaryny ösdürmek" niýetini ýene bir gezek tassyklady.
Türkmen diplomaty iki döwlet üçin möhüm taslamalaryň hatarynda Owganystanyň demirgazygyndaky Andhoý (Farýab welaýaty) şäherinden geçýän Türkmenistan-Owganystan-Täjigistan demir ýol magistralynyň gurluşygyny tamamlamak, Türkmenistanyň Günorta Aziýa gaz iberjek TOPH gaz geçirijisiniň tasmalasyny durmuşa geçirmek, şeýle hem elektroenergetika ulgamynda taslamalary ileri tutulýan wezipeler hökmünde belläp geçdi.
Türkmenistan şeýle hem doganlyk owgan halkyna ynsanperwer kömegini bermegini dowam etjekdigini beýan etdi.
