Germaniýada suwy gyzdyrmak we jaýlary ýylatmak üçin niýetlenen Gün kollektorlaryna bolan isleg barha artýar. Hünärmenleriň çykaran netijelerine görä, bu enjamlaryň Gün energiýasyny ýylylyga öwürmekdäki netijeliligi 80–90%-e ýetýär.
Radio ZET-iň berýän maglumatyna görä, häzirki wagtda ýurtda takmyndan 22 million inedördül metr meýdany tutýan Gün kollektorlary ulanylýar. Bu görkeziji goňşy döwletleriňkiden has ýokarydyr.
Bu güýçli islegiň esasy sebäpleriniň biri döwlet tarapyndan berilýän goldaw maksatnamalary hem-de ýylylyk zerurlygynyň agramly bölegini Gün şöhlesinden alýan «Gün öýleri» (solar houses) düşünjesiniň giňden ýaýramagydyr.
Hünärmenleriň bellemegine görä, Gün kollektorlary adaty elektrik öndürýän Gün panelleriniň ýerini tutman, eýsem olaryň üstüni ýetirýär. Häzirki wagtda bu iki tehnologiýa ýylylyk nasoslary we energiýany saklaýan ulgamlar bilen bilelikde has ýygy-ýygydan utgaşdyrylyp ulanylýar.
Gün kollektorlary aýratyn-da köp öýli ýaşaýyş jaýlary, myhmanhanalar, sport desgalary we bütin ýylyň dowamynda gyzgyn suw sarp edilişi ýokary bolan beýleki binalar üçin iň amatly we netijeli ulgam hasaplanylýar.
