Ispaniýanyň hökümeti raýatlaryň durmuş şertlerini gowulandyrmak we ýurduň ekologik ýagdaýyny üýtgetmek maksady bilen, täze Durmuş-klimat meýilnamasyny taýýarlady. Taslama laýyklykda, döwlet tarapyndan 9 milliard ýewro möçberinde kömek pullary bölüp berler.
Bu uly meýilnama ýylyň ahyryna çenli Brýussele tassyklanylmak üçin iberiler diýip, Euronews habar berýär. Hökümet bu taslamanyň kömegi bilen bir tarapdan tebigaty goramagy, beýleki tarapdan bolsa halkyň arasyndaky sosial deňsizligi azaltmagy maksat edinýär.
Meýilnamanyň esasy ugurlary:
Ýaşaýyş jaýlarynyň döwrebaplaşdyrylmagy (4,7 milliard ýewro): Bu serişdeler durmuş taýdan goragsyz we az girdejili maşgalalaryň jaýlaryny abatlamaga, olaryň energiýa tygşytlylygyny ýoklandyrmaga sarp ediler. Döwlet ähli sebitlerde jaýlary täzelemek medeniýetini döredip, raýatlaryň kommunal çykdajylaryny we binalardan çykýan zyňyndylary azaltmagy göz öňünde tutýar.
Elýeterli we arassa ulaglar (4,3 milliard ýewro): Oba ýerlerinde we şäherlerde ekologik taýdan arassa ulag ulgamy ösdüriler. Şeýle hem köne, tebigaty hapalaýan ulaglary täzelemäge ýardam berler hem-de jemgyýetçilik ulaglarynyň elýeterliligi has-da giňeldiler.
Adalatly we bähbitli özgertme
Ispaniýanyň Premýer-ministri Pedro Sançes ekologik özgertmeleriň diňe gurply adamlar üçin däl-de, eýsem tutuş halk üçin elýeterli bolmalydygyny öňe sürýär. Ol:
– Energetika öwürilişigi haçan-da, adalatly bolanda öz maksadyna ýeter. Aslynda adamlar üçin «Sag-aman aýyň ahyryna çenli ýetip bilsem» bilen «Sag-aman asyryň ahyryna çenli ýetip bilsem» diýlen aladalaryň arasynda saýlaw bolmaly däldir – diýip, bu hakynda aýratyn nygtady.
Ispaniýanyň hökümetiniň maglumatyna görä, 2018-nji ýyldan bäri ýurtda atmosferany hapalaýan gazlaryň mukdary 19% azaldy. Şol bir wagtda elektrik energiýasyny öndürmekde gaýtadan dikeldilýän çeşmeleriň (ýel we Gün energiýasynyň) paýy 39%-den 56%-e çenli ýokarlanmagy başardy. Bu bolsa ekologik özgertmeleriň ykdysady ösüşe zyýan ýetirmeýändigini subut edýär.
