Germaniyada awtomobil köprülerini gurmagyň täze usuly ulanylyp başlandy, onda adaty demir-beton gurnamalaryň ýerine dykyzlandyrylan toprak we plastik torlar ulanylýar.
Bu tehnologiýa uly bolmadyk köprüler üçin niýetlenendir we ol eýýäm A3 awtomagistralyndaky bäş sany köpriniň durkuny täzelemekde ulanyldy. Inženerleriň aýtmagyna görä, her obýektdäki işler takmynan üç aý töweregi wagt aldy, köprüleriň astyndaky gidiş-geliş bolsa diňe hepdäniň iki dynç günleri ýapyldy.
Kiçi köprüleriň iň gowşak bölegi, adatça, wagtyň geçmegi bilen mikro-jaýryklar emele gelýän direg gurnamalary hasaplanylýar. Bu bolsa betonyň zaýalanmagyna we desgalaryň berkliginiň gowşamagyna getirýär.
Betonyň ýerine dykyzlandyrylan topragy ulanmak pikiri baryp, 1960-njy ýyllarda Fransiýada ýüze çykypdy. Şonda inženerler topragyň giňelmeginiň öňüni alýan gaýym tor bilen ony berkitmegi teklip edipdiler.
Nemes hünärmenleri bolsa dykyzlandyrylan we plastik torlar bilen berkidilen topragyň gezekleşýän gatlaklaryndan köp gatlakly gurnamalary döredip, bu çemeleşmäni has-da ösdürdiler. Bu ýerde plastik esasy agramy götermeýär, eýsem topragyň göwrümini üýtgetmeginiň öňüni alýar.
Inženerler şeýle tehnologiýanyň betonyň ulanylyşyny azaltmaga, gurluşygyň gymmatyny peseltmäge we işleri çaltlandyrmaga mümkinçilik berýändigini aýdýarlar. Şunda gurnamanyň berkliginiň adaty çözgütler bilen bäsleşip biljek derejededigi öňe sürülýär.
Bu usuly beýik köprüler üçin däl-de, has ýönekeý desgalar üçin ulanyp bolýar.
