Aşgabat şäheriniň Büzmeýin etrabynyň «Bagyr» ýaşaýyş toplumynda täze mekdepler, çagalar bagy we saglyk öýi gurlar. Paýtagty durmuş-ykdysady taýdan ösdürmek we şäher infrastrukturasyny döwrebaplaşdyrmak maksady bilen, degişli Karara Türkmenistanyň Prezidenti Serdar Berdimuhamedow gol çekdi.
Resminama laýyklykda, Aşgabat şäheriniň häkimligine Büzmeýin etrabynda her biri 720 orunlyk 2 sany umumybilim berýän mekdebiň, 320 orunlyk çagalar bagynyň hem-de kämil lukmançylyk enjamlary bilen üpjün ediljek saglyk öýüniň taslamalaryny düzmek we gurmak barada ýerli gurluşyk kärhanalary bilen şertnamalary baglaşmaga ygtyýar berildi.
Täze binalaryň gurluşyk işlerine 2026-njy ýylyň maý aýynda başlanar. Bilim ojaklaryny we çagalar bagyny 2027-nji ýylyň sentýabr aýynda, saglyk öýüni bolsa 2027-nji ýylyň oktýabr aýynda ulanmaga bermek meýilleşdirilýär.
