40 million ýyllyk taryhy bolan baltika ýantarynyň nusgasyndan guş ýelegi ýüze çykaryldy. Bu tapyndy dünýä ýantarynyň köp böleginiň çykarylýan ýeri bolan Palmniken ýatagynda (Ýantarnyý kärhanasy) edildi. Häzirki wagtda ol Kaliningradyň Dünýä ummany muzeýiniň gaznalarynda saklanýar.
Ýantaryň agramy 13,9 gram, ölçegleri bolsa 43-e 37 millimetrdir. Daşyň içinde ýelek görnüp dur, ol ähtimal ownuk guşa degişli bolmaly.
«Ýelek gurluşy taýdan ýönekeý: uzyn sapagy we ondan çykýan gysga tüýjümekleri bar. Gynansak-da, ýelek ujy döwülen. Ýelekden başga-da, ýantarda agaç bölekleri ýaly ösümlik galyndylary hem gatap galypdyr» diýip, Dünýä ummany muzeýiniň tebigat bölüminiň uly ylmy işgäri Nikolaý Martynowiç belledi.
Muzeýiň maglumatlaryna görä, şeýle tapyndylar örän seýrek duş gelýär: Russiýada guş ýelekli ýantaryň diňe iki nusgasy bellidir, olar hem Kaliningrad ýantar muzeýiniň kolleksiýasynda saklanýar.
Tapyndynyň hakykylygyny tassyklamak üçin hünärmenler faza-kontrastly surata düşürmek, ultramelewşe şöhlelerinde barlaglar, ýagtylyk mikroskopiýasy, suwda ýüzüş synagy we gyzdyrylan iňňe bilen barlag geçirdiler. Iňňe ysy nusganyň hakyky baltyk ýantarydygyny tassyklady. Ekspertiza ýelimleme, guýma we emeli garatma yzlarynyň ýokdugyny hem görkezdi.
Baltika ýantary Skandinawiýa ýarymadasynyň günortasynda we goňşy sebitlerde ösen gadymy iňňe ýaprakly agaçlaryň gatap galan smolasy bolup durýar.
Alymlar bu tapyndynyň eosen döwrüniň «ýantar tokaýynyň» ekosistemasyny has gowy düşunmäge we 40 million ýyl mundan ozal Baltyk deňziniň kenarynda ýaşan guşlary öwrenmäge kömek etjekdigine ynanýarlar.
