Hytaý awtoöndürijileri awtomobillere üç tigirde hereket etmäge we zeper ýeten tigri galdyrgyç (domkrat) ulanmazdan çalyşmaga mümkinçilik berýän işjeň asgy (podweska) ulgamlaryny ornaşdyrmaga başlady. Bu barada «CarNewsChina» neşiri ýazýar.
Şeýle tehnologiýalary ilkinjileriň biri bolup BYD kompaniýasy ulanyp başlady. Denza B8 (Fang Cheng Bao Leopard 8 brendi bilen hem satylýar) gibrid ýolsuzlyk awtomobilinde gurnalan «DiSus-P Ultra» asgy ulgamy her bir tigriň kuzowa görä ýagdaýyny üýtgetmäge we üç tigre daýanyp, durnuklylygy saklamaga mümkinçilik berýär. Awtomobil zeper ýeten tigri ýola degirmezden, sagatda 15 km çenli tizlik bilen hereket etmäge ukyplydyr.
Tigri çalyşmak režiminde ulgam galdyrgyç ulanmazdan, her bir tigri gezekli-gezegine galdyrýar. Asgy ulgamynyň kömegi bilen olaryň birini galdyrmak üçin bir minutdan hem az wagt gidýär, çalyşmagy bolsa iki minutda diýen ýaly amala aşyryp bolýar. «DiSus-P Ultra» asgy ulgamy 9 tonna galdyryş güýjüni döredýär, ol agyr ýolsuzlyk awtomobiline çägeli ýerlerden çykmaga hem kömek edýär.
Şeýle mümkinçilikler beýleki hytaý modellerinde hem peýda boldy. Huawei-niň goldawy bilen çykarylýan Aito M9 krossoweri hem üç tigirde hereketini dowam etdirmäge ukyplydyr. Şuňa meňzeş tehnologiýa Li Auto L9 Livis flagman krossowerinde hem peýda boldy.
Şol bir wagtda öndürijiler dürli tehniki çözgütleri ulanýar. Li Auto we Aito modellerinde gidrawlik ulgam ulanylsa, BYD-yň Yangwang U7 sport awtomobili ýagsyz işleýän elektromagnit aktualatorlary ulanýar.
