NASA Aýyň daşyndan aýlanmak boýunça amala aşyrylan «Artemis II» missiýasy wagtynda düşürilen suratlaryň doly arhiwini çap etdi.
Jemi 12 217 sany surat elýeterli bolup, olaryň agramly bölegi ozal hiç ýerde çap edilmändir. Suratlaryň ählisi ýokary durulykda hödürlenýär.
«Artemis II» missiýasy soňky 50 ýyldan gowrak wagtyň içinde Aýyň ýüzüne gonmazdan, onuň daşyndan amala aşyrylan ilkinji dolandyrylýan uçuş boldy. Aprel aýynyň başynda dört sany astronawt «Space Launch System» raketasynyň kömegi bilen «Orion» gämisinde älem giňişligine ugradyldy.
Orbita çykanyndan soň, güýçlendiriji blok gämini Aýyň daşyndan aýlanmak traýektoriýasyna çykardy. Uçuşy tamamlap, «Orion» sagatda takmynan 40 müň kilometr tizlik bilen Ýeriň atmosferasyna girdi. Kapsula Ýuwaş ummanyna gondy we ol ýerde ekipažy halas ediş gulluklary garşylady. Tutuş missiýa 10 gün dowam etdi.
Häzirki wagtda NASA indiki — «Artemis III» missiýasyna taýýarlyk görýär, ol hem Aýyň ýüzüne gonmagy göz öňünde tutmaýar. «Apollon» döwründen bäri ynsanyň Aýyň ýüzüne ilkinji gezek aýak basmagy 2028-nji ýylyň başynda «Artemis IV» missiýasynyň çäginde meýilleşdirilýär. Şol ýylyň ahyrynda bolsa «Artemis V» ekspedisiýasyna garaşylýar. Bu bolsa maksatnamanyň üstünligini berkitmek bilen birlikde, Aýda durnukly bazanyň gurluşygyna badalga berer.
