«Roskosmos» 2036-njy ýyla çenli Aýda atom elektrik stansiýasyny (AES) döretmegi meýilleşdirýär. Bu wezipe Russiýa Federasiýasynyň Prezidentiniň kosmos işi ulgamyndaky döwlet syýasatynyň esaslary baradaky permanynyň taslamasyna girizildi diýip, kadalaşdyryjy hukuk namalarynyň taslamalarynyň federal portalyndaky maglumatlara salgylanyp «Interfaks» ýazýar.
Resminama görä, Aýdaky AES Russiýanyň Aý maksatnamasynyň we halkara hyzmatdaşlyk taslamalarynyň çäklerinde Aýyň üstündäki infrastrukturany elektrik energiýasy bilen üpjün etmelidir.
2036-njy ýyla çenli ileri tutulýan ugurlaryň hatarynda Aýy awtomatik kosmos enjamlary arkaly öwrenmek, Ýere Aý topragynyň nusgalaryny getirmek, Halkara kosmos stansiýasyny howpsuz ulanmak we onuň işini tamamlamak, şeýle hem Russiýanyň orbital stansiýasyny ýerleşdirmek ýaly wezipeler bellenildi.
Mundan başga-da, Ýeri uzak aralykdan öwrenmek hem-de köp hemraly, pes orbitaly, giň zolakly aragatnaşyk ulgamyny döretmek göz öňünde tutulýar.
2036-njy ýyldan soň bolsa «Roskosmos» ýadro energetika desgalary bolan ulag serişdelerini kosmosa çykarmagy, Aýyň we asteroidleriň serişdelerini gözläp tapmaga hem-de özleşdirmäge girişmegi, Halkara ylmy Aý stansiýasyny döretmäge gatnaşmagy we Aýy hem-de uzak kosmosy öwrenmek boýunça bilelikdäki rus-hytaý Maglumatlar merkeziniň Russiýa degişli bölegini ösdürmegi meýilleşdirýär.
Şeýle hem resminamada astrofiziki gözlegleri dowam etdirmek we dolandyrylýan kosmonawtika maksatnamalaryny ýerine ýetirmek göz öňünde tutulýar.
