Şu gün Türkiýäniň Izmir şäherinde üçünji «Turan» halkara kinofestiwalynyň çäklerinde türkmen kinosynyň görkezilişi bolar. Çäre Egeý uniwersitetiniň Kommunikasiýalar fakultetiniň mejlisler zalynda sagat 13:00-da başlanar diýip, THP habar berýär.
Ýokary okuw mekdebiniň jemgyýetçilik torlarynda berilýän maglumata görä, kino görkezilişi uniwersitet tarapyndan Türkiýäniň Medeniýet we syýahatçylyk ministrliginiň Kinematografiýa baş müdürligi bilen hyzmatdaşlykda guralýar.
Tomaşaçylara türkmen režissýorlarynyň ýurduň medeni we çeperçilik aýratynlyklaryny açyp görkezýän gysga metražly filmleriniň toplumy hödürlener. Görkezilişiň guralmagy türkmen kinematografiýasyny daşary ýurtlarda tanatmaga we medeni dialogy mundan beýläk-de ösdürmäge gönükdirilendir.
Çäräniň maksatnamasyna şu filmler girizildi:
- «Gysga ýol» — Serdar Durdyýew
- «Mähir terbiýesi» — Mekan Gurbanalyýew
- «Meniň oýnum» — Röwşen Welmiýew
- «Oýunda bilelikde» — Mekan Gurbanalyýew
- «Tebigatyň ýylgyran ýüzi» — Mämmet Hojagulyýew
- «Tikenjik, mymyjak, bagyşla» — Röwşen Welmiýew
- «Ýeňişli ädimler» — Batyr Batyrow
