Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň mejlisini geçirdi. Onda milli ykdysadyýetiň pudaklarynyň 2026-njy ýylyň ilkinji dört aýynda bitiren işleriniň jemleri jemlendi. Bu barada «Watan» habarlar gepleşiginde habar berildi.
Hasabat döwrüniň netijeleri boýunça ýurduň jemi içerki önüminiň (JIÖ) ösüşi 6,3%-e deň boldy. Bu görkeziji döwletiň durnukly ösýändigini we kabul edilen durmuş-ykdysady maksatnamalaryň üstünlikli durmuşa geçirilýändigini tassyklaýar.
Makroykdysady görkezijiler we maliýe:
- Senagat pudagynda ösüş depgini 2,4%, gurluşykda 6,2%, ulag-aragatnaşyk ulgamynda 10,3%, söwdada 7,9%, oba hojalygynda 2,2%, hyzmatlar ulgamynda bolsa 8,4% boldy.
- Öndürilen önümleriň möçberi geçen ýylyň degişli döwri bilen deňeşdirilende 10,4% artdy.
- Bölek satuw haryt dolanyşygy 9,9%, daşary söwda dolanyşygy bolsa 9,2% ýokarlandy.
- Döwlet býujetiniň girdeji bölegi 100,2%, çykdajy bölegi bolsa 97,6% ýerine ýetirildi.
- Zähmet haklary, pensiýalar, döwlet kömek pullary we talyp haklary doly möçberde we öz wagtynda maliýeleşdirildi.
- Ähli maliýe çeşmeleriniň hasabyna özleşdirilen maýa goýumlaryň möçberi 5% ýokarlandy.
Nebitgaz toplumy:
- «Türkmennebit» döwlet konserni tarapyndan nebit çykarmagyň meýilnamasy 107,1% berjaý edildi.
- Zawodlarda nebiti gaýtadan işlemegiň meýilnamasy 104,9% boldy.
- Benzin öndürmegiň meýilnamasy 113,7%, dizel ýangyjy 108,7%, çalgy ýaglary 110,3%, suwuklandyrylan gaz bolsa 122,1% ýerine ýetirildi.
- Tebigy we ugurdaş gazy çykarmagyň meýilnamasy 106,7% amala aşyryldy.
Gurluşyk we senagat toplumy:
- Toplum boýunça önüm öndürmegiň we işleri ýerine ýetirmegiň umumy meýilnamasy 128,4% berjaý edildi.
- Senagat we gurluşyk önümçiligi ministrligi meýilnamany 122,5%, Energetika ministrligi 106%, «Türkmenhimiýa» döwlet konserni bolsa 154% berjaý etdi.
- Aşgabat şäher häkimligi iş meýilnamasyny 122,9% ýerine ýetirdi.
Ulag we aragatnaşyk toplumy:
- Ulag-aragatnaşyk toplumynda ösüş 113,8% boldy.
- Awtomobil ulaglary ulgamyndaky hyzmatlaryň ösüş depgini 124,2%-e, «Türkmenhowaýollary» döwlet gullugy boýunça 116,8%-e, aragatnaşykda bolsa 114,3%-e barabar boldy.
Prezident Serdar Berdimuhamedow degişli ýolbaşçylara JIÖ-niň ösüş depginini saklamagy, nyrhlara we bazarlaryň haryt üpjünçiligine berk gözegçilik etmegi, şeýle hem gurluşygy dowam edýän desgalary wagtynda ulanmaga bermegi tabşyrdy.
