25-nji aprelde Aşgabat atçylyk sport toplumynda Prezident Serdar Berdimuhamedowyň gatnaşmagynda Türkmen bedewiniň milli baýramy mynasybetli dabaralar geçirildi. Bu barada «TDH» döwlet habarlar agentligi habar berýär.
Dabaralara Hökümet agzalary, ministrlikleriň we pudaklaýyn dolandyryş edaralarynyň ýolbaşçylary, diplomatik wekilhanalaryň, halkara guramalarynyň wekilleri we atşynas hünärmenler gatnaşdy.
Baýramçylygyň çäklerinde bu ýerde «Ýylyň iň owadan ahalteke bedewi» atly halkara gözellik bäsleşiginiň netijeleri jemlendi, şeýle hem at çapyşyklarynyň we döredijilik bäsleşiginiň ýeňijileri sylaglanyldy.
Şeýle-de, dabarada Pyýada atly ahalteke bedewiniň heýkeliniň açylyş dabarasy boldy.
Gözellik bäsleşiginiň ýeňijisi Türkmenistanyň Prezidentiniň Ahalteke atçylyk toplumyna degişli bolan Hankerwen atly bedew boldy. Oňa «Toyota Fortuner» awtomobili, göçme kubok we diplom gowşuryldy.
Uzak aralyga atly ýöriş bäsleşiginde Meleguş, bedewleriň päsgelçiliklerden böküp geçmek boýunça bäsleşiginde bolsa Gudratly atly bedewler ýeňiş gazandy. Ýeňijiler pudak edaralarynyň baýraklaryna mynasyp boldy.
Türkmenistanyň Prezidenti Pyýadanyň heýkeline, sungat eserleriniň, at enjamlarynyň we milli önümleriň sergisine tomaşa etdi.
Çäre medeniýet we sungat ussatlarynyň çykyşlary bilen utgaşdy.
Dabaranyň barşynda döwlet Baştutanyna ýurduň bäş welaýatyndan, Aşgabat we Arkadag şäherlerinden, şeýle hem harby we hukuk goraýjy edaralaryň hem-de pudaklaýyn wekilleriň adyndan ahalteke bedewleri sowgat berildi.
Baýramçylyk maksatnamasy konsert we toý sadakasy bilen jemlendi.
