Bangkokda geçirilen ESCAP-yň 82-nji sessiýasynyň çäklerinde Türkmenistanyň maliýe we ykdysadyýet ministriniň orunbasary Perhat Ýagşyýewiň ýolbaşçylygyndaky wekiliýet komissiýanyň ýerine ýetiriji sekretary Armida Salsiýa Alişahbana bilen duşuşdy.
Taraplar ulag-logistika gatnaşyklaryny, energetika, sanlylaşdyrma we söwda ýaly möhüm ugurlary ösdürmekde hyzmatdaşlygy ara alyp maslahatlaşdy. 2027-nji ýyl üçin meýilleşdirilen Durnukly ösüş maksatlary boýunça üçünji Meýletin milli syny taýýarlamaga aýratyn üns berildi. ESCAP bu işde maslahat beriş we seljeriş goldawyny bermegini dowam etdirer.
Şeýle hem Türkmenistanyň we sebitiň üstaşyr mümkinçiliklerini giňeltmäge gönükdirilen infrastruktura taslamalary maslahatlaşyldy. Ýurduň howanyň üýtgemegi babatda we ekologiýa gün tertibini ilerletmekdäki işjeň orny bellenildi.
Sessiýanyň dowamynda Türkmenistanyň wekiliýeti sebit hyzmatdaşlygyny we maýa goýum taýdan özüne çekijiligi ýokarlandyrmak boýunça geçirilen ara alyp maslahatlaşmalara hem gatnaşdy. Merkezi Aziýa ýurtlarynyň ykdysadyýetleri üçin BMG-niň Ýörite maksatnamasyna (SPEKA) gatnaşyjy ýurtlaryň ministrler derejesindäki duşuşygy sessiýanyň çäklerindäki möhüm waka boldy, onuň netijeleri boýunça «Bilelikdäki beýannama» kabul edildi. Bu ýerde «2030-njy ýyla çenli Maksatnamanyň çäklerinde ykdysady hyzmatdaşlygy mundan beýläk-de ösdürmegiň maksatlaryny we wezipelerini kesgitlemek bilen SPEKA-nyň ösüş konsepsiýasynyň» institusional gurallaryna aýratyn üns berildi.
Türkmen tarapynyň esasy teklibi hökmünde Türkmenistanyň Hökümetiniň Merkezi Aziýa ýurtlary üçin çölleşmä garşy göreşmek boýunça sebit merkezini ESCAP-yň ýöriteleşdirilen instituty hökmünde döretmek baradaky başlangyjy hödürlendi. Bu taslamanyň durmuşa geçirilmegi daşky gurşawy goramak meselelerinde sebit mümkinçiliklerini birleşdirmäge we sebitiň BMG-niň 2030-njy ýyla çenli Gün tertibini amala aşyrmak işine uly goşant goşmagyna ýardam eder.
Sessiýanyň netijeleri boýunça ESCAP-yň indiki duşuşygyny 2027-nji ýylyň 26–30-njy apreli aralygynda Şanhaýda (Hytaý) geçirmek barada çözgüt kabul edildi.
