2026-njy ýylyň iýun aýynda paýnamalary ilkinji gezek köpçülige hödürlemegi (IPO) meýilleşdirýän SpaceX kompaniýasy potensial maýadarlary emeli aň üçin orbital maglumat merkezlerini döretmek bilen baglanyşykly töwekgelçilikler barada resmi taýdan duýdurdy. Bu barada Reuters agentligi habar berýär.
Düzgünleşdiriji edaralara tabşyrylan resminamalara görä, Ýeriň, Aýyň orbitasynda we planetaara orbitada hasaplaýyş ulgamlaryny döretmek boýunça başlangyçlar entek başlangyç tapgyrlarda we subut edilmedik tehnologiýalara daýanýar, bu bolsa olaryň täjirçilik taýdan netijeli bolmagyna päsgel berip biler.
ABŞ-nyň kanunçylygy kompaniýalaryň maýa goýujylara serişde toplamazdan öň mümkin bolan töwekgelçilikler barada habar bermegini talap edýär. SpaceX kosmos maglumat merkezleriniň ekstremal şertlerde işlemeli boljakdygyny, radiasiýa, uçurmak üçin gerek ýokary çykdajylar we abatlamak bilen bagly kynçylyklar enjamlary hatardan çykaryp biljekdigini belleýär.
Muňa garamazdan, AI-ulgamlaryň ýerüsti kuwwatynyň ýetmezçiligi we ägirt uly energiýany sarp edýändigi sebäpli kompýuterleri kosmosa çykarmaga gyzyklanma artýar. Google we Blue Origin ýaly kompaniýalar hem emeli aň ulgamlary üçin Gün energiýasyny we wakuumda tebigy sowadyşy ulanmagy öwrenýärler.
SpaceX listinge taýýarlyk görmegiň çäklerinde emeli aň bazaryndaky ornuny işjeň güýçlendirýär. Fewral aýynda kompaniýa Ilon Maskyň xAI startapy bilen güýçlerini birleşdirdi we 22-nji aprelde bolsa emeli aň gurallaryny işläp düzüji Cursor kompaniýasyny 60 milliard dollara satyn almak meýilnamasy yglan edildi. Bloomberg agentligi SpaceX kompaniýasynyň geljekki IPO-da 1,75 trillion dollardan gowrak maýa goýumyny gazanyp biljekdigini çaklaýar.
SpaceX-iň listinginiň 2026-njy ýylda OpenAI-y we Anthropic-i hem öz içine alyp biljek giň gerimli "IPO ýaryşynyň" bir bölegi bolmagyna garaşylýar.
