Hytaýyň DeepSeek startapy maliýeleşdirmegiň birinji tapgyryny tamamlap, 50 milliard ýuandan (takmynan 7,4 milliard dollar) gowrak serişde çekdi we bazarda 50 milliard dollardan ýokary bahany aldy.
Reuters we The Information çeşmeleriniň maglumatlaryna görä, bu kompaniýa Hytaýda emeli aň ulgamyndaky iň gymmat startap boldy.
DeepSeek-iň esaslandyryjysy Lýan Wenfen taslama, takmynan, 3 milliard dollar maýa goýdy we şertnamanyň aýratyn gurluşy netijesinde kompaniýanyň üstünden gözegçiligi öz elinde saklamagy başardy. Maýadarlar serişdelerini startapyň ýolbaşçylygynyň dolandyrmagyndaky jogapkärçiligi çäklendirilen hyzmatdaşlyk arkaly gönükdirdi, şol sebäpli ses bermek hukugyna eýe bolmady.
Diňe, takmynan, 150 million dollar maýa goýan Hytaýyň emeli aň senagatynyň milli maýa goýum gaznasy kadadan çykma boldy — ol serişdelerini göni ýollady we dolandyryşa gatnaşmak mümkinçiligini saklap galdy.
Iň uly maýadarlaryň arasynda, takmynan, 1,5 milliard dollar goýan Tencent kompaniýasy we 740 million dollar maýa goýan akkumulýator öndürijisi Contemporary Amperex Technology (CATL) hem bar. Çekilen serişdeleri emeli aň tehnologiýalaryny mundan beýläk-de ösdürmäge gönükdirmek meýilleşdirilýär.
