Britaniýanyň Basecamp Research kompaniýasy «Trillion Gene Atlas» atly täze taslama badalga berlendigini mälim etdi. Bu taslama mundan ozal hiç hili öwrenilmän galan 100 milliondan gowrak dürli görnüşli janly-jandarlaryň gen maglumatlaryny ýygnamagy we seljermegi göz öňünde tutýar.
Guramaçylaryň aýtmagyna görä, taslama häzirki wagtda ylma mälim bolan şeýle maglumatlaryň möçberini takmynan ýüz esse artdyrmaga mümkinçilik berer. Taslama Anthropic, Ultima Genomics, PacBio kompaniýalary bilen bilelikde hem-de Nvidia kompaniýasynyň güýçli hasaplama operasiýalarynyň ornaşdyrylmagynda amala aşyrylýar.
Hünärmenler döwrebap sewenirleme tehnologiýalaryny we emeli aňy utgaşdyrmak arkaly, bu ägirt uly işi iki ýyldan hem az wagtyň içinde tamamlamagy meýilleşdirýärler. Taslamanyň esasy maksady – biologiýa ugruna ýöriteleşdirilen emeli aň modellerini türgenleşdirmek üçin täze maglumat goruny döretmekdir.
Kompaniýa eýýäm häzirki wagtyň özünde bir million töweregi täze görnüşli janly-jandarlardan tapylan, ozal nämälim bolan 10 milliarddan gowrak genetik çeşmelere eýedigini ýaňzytdy. Alnan bu gymmatly maglumatlar bejeriş molekulalaryny we beýleki biotehnologik çözgütleri işläp düzmek üçin döredilen «EDEN» maşgalasynyň emeli aň modellerini okatmak üçin niýetlenilendir.
Taslamanyň awtorlary bu işi özüniň göwrümi boýunça meşhur «Adam genomy» maksatnamasy bilen deňeşdirýärler. Emma bu gezek gürrüň diňe bir görnüşiň, ýagny täk adamyň däl-de, eýsem, Ýer ýüzündäki genetik dürlüligiň taryhdaky iň uly kartasyny döretmek barada gidýär.
