ChatGPT-niň aýlyk işjeň ulanyjylarynyň sany bir milliarddan geçdi. Bu hem ony taryhda şeýle uly auditoriýa sanyna iň çalt ýeten sanly önüme öwürdi. Bu barada Sensor Tower analitik kompaniýasy habar berýär.
Aýda bir milliard işjeň ulanyjy sanyna ýetmek üçin OpenAI kompaniýasynyň EA modeline, takmynan, üç ýyl gerek boldy. Bu görkeziji boýunça ChatGPT dünýäniň TikTok, Instagram we YouTube ýaly iň iri sanly platformalaryny hem yzda galdyrmagy başardy.
Şol bir wagtda, bazarda Anthropic kompaniýasy tarapyndan bäsdeşlik barha güýçlenýär. Onuň Claude çat-botunyň häzirki wagtda aýda, takmynan, 56 million işjeň ulanyjysy bar. Soňky bir ýylyň dowamynda Claude modeliniň ulanyjylar sany 640% artan bolsa, ChatGPT-niň ösüşi 62% boldy.
Geçirilen gözlegleriň maglumatlaryna görä, 2026-njy ýylyň birinji çärjeginde Claude-y gurnan ABŞ-ly ulanyjylar, bir aýdan soň ChatGPT-de ortaça 5% az wagt geçirip başlady.
Bäsdeşligiň güýçlenmegi bilen kompaniýalar maýa goýumlary çekmegiň nobatdaky tapgyrlaryna taýýarlyk görýär. Anthropic eýýäm ABŞ-da paýnamalaryny ilkinji gezek biržada ýerleşdirmek (IPO) barada arza tabşyrdy. «Reuters» habarlar gullugynyň maglumatyna görä, OpenAI hem ýakyn hepdelerde şeýle arza bermegiň mümkinçiliklerini gözden geçirýär.
