22-nji aprelde Astanada geçirilen Sebitleýin ekologiýa sammitinden soň, Türkmenistanyň Prezidenti Serdar Berdimuhamedow Araly halas etmegiň halkara gaznasyny (AHHG) esaslandyryjy döwletleriň Baştutanlarynyň Geňeşiniň mejlisine gatnaşdy. Bu barada «Watan» habarlar gepleşiginde habar berildi.
Döwlet Baştutany mejlisdäki çykyşynda dünýädäki çylşyrymly geosyýasy ýagdaýlara garamazdan, Aral meselesi we sebitiň ekologiýa howpsuzlygy ýaly möhüm wezipeleriň ünsden düşürilmeli däldigini nygtady.
Türkmenistanyň Aral deňzi boýunça halkara derejesinde alyp barýan işjeň tagallalaryna üns çekilip, ýurduň başlangyjy bilen BMG-niň Baş Assambleýasynyň «BMG bilen AHHG-niň arasynda hyzmatdaşlyk» atly Kararnamalarynyň kabul edilendigi we Aral deňziniň basseýniniň ýurtlary üçin BMG-niň Ýörite maksatnamasyny (UN SPAS) döretmek boýunça anyk ädimleriň ädilendigi bellenildi. Prezident Serdar Berdimuhamedow Aral meselelerine çölleşme, buzluklaryň eremegi we serhetüsti suw serişdelerini dolandyrmak ýaly ekologiýa wehimleri bilen bitewülikde garamagyň zerurdygyny nygtady.
Döwlet Baştutany AHHG-niň şertnamalaýyn-hukuk binýadyny döwrebaplaşdyrmagy, Aral deňziniň sebitiniň meselelerini çözmek bilen bagly taslamalary we maksatnamalary durmuşa geçirmekde halkara maliýe institutlary hem-de donorlar bilen işjeň hyzmatdaşlyk etmegi, häzirki geosyýasy we ykdysady ýagdaýlary göz öňünde tutup, BMG bilen AHHG-niň hyzmatdaşlygy baradaky Baş Assambleýanyň täze Kararnamasyny bilelikde işlemegi teklip etdi.
Mejlisiň ahyrynda döwlet Baştutany Özbegistan Respublikasynyň Prezidenti Şawkat Mirziýoýewi Araly halas etmegiň halkara gaznasynda başlyklyk etmäge girişmegi bilen gutlap, bu ugurda alyp barjak işlerinde üstünlikleri arzuw etdi.
Gazagystan Respublikasyna iş saparynyň maksatnamasyny tamamlandan soň, Prezident Serdar Berdimuhamedow Astana şäheriniň Nursultan Nazarbaýew adyndaky halkara howa menziline baryp, bu ýerden Aşgabada ugrady.
