Şanhaýdaky Fudan uniwersitetiniň alymlary tarapyndan geçirilen täze barlag kofe içmegiň psihiki saglyga gowy täsir edýändigini we depressiýanyň öňüni alyp biljekdigini tassyklady.
13 ýylyň dowamynda «UK Biobank» maglumatlar binýady arkaly 460 müňden gowrak adamyň saglyk ýagdaýyny derňän alymlar, kofeniň «altyn aralyk» düzgünine laýyk gelýändigini ýüze çykardylar.
Barlagyň netijeleri Journal of Affective Disorders žurnalynda çap edilip, onda günde iki-üç bulgur kofe içýän adamlarda depressiýa we stres derejesiniň iň pes derejededigi anyklandy. Şol bir wagtyň özünde, barlagda göni bolmadyk baglanyşyk hem ýüze çykdy. Oňa görä, kofeni gaty az ýa-da gaty köp (günde bäş we ondan köp bulgur) içýän adamlarda bu peýdaly täsir duýulmaýar, hatda köp içmek tersine, psihiki bozulmalaryň töwekgelçiligini-de ýokarlandyryp bilýär.
Alymlar munuň sebäbini kofeniň düzümindäki 1000-den gowrak işjeň madda, şol sanda polifenollar we hlorogen turşusy bilen düşündirýärler. Bu maddalar bedende çişmä garşy täsir edýär. Kofein bolsa beýni öýjüklerini stresden goraýjy täsire eýe bolup, beýnidäki belli bir reseptorlary işjeňleşdirip, depressiýa garşy göreşmäge kömek edýär.
Barlagda kofeniň görnüşiniň (üwelen, ergin ýa-da kofesiz) we organizmiň kofeini özleşdiriş tizliginiň bu netijelere düýpli täsir etmeýändigi anyklandy. Bütindünýä Saglygy Goraýyş Guramasynyň maglumatlaryna görä, dünýäde bir milliarddan gowrak adam psihiki bozulmalar bilen ýaşaýar. Şol sebäpli alymlar kofeniň bu peýdaly häsiýetiniň, iýmitlenmäniň we kadaly durmuş ýörelgesiniň ruhy saglygy goramakda we bejeriş maksatnamalarynda täsirli tejribe bolup biljekdigini belleýärler.
