15-nji aprelde Myrat Garryýew adyndaky Türkmenistanyň Döwlet lukmançylyk uniwersitetinde Pekiniň hytaý lukmançylygy uniwersitetiniň rektory Tan Çžişunyň ýolbaşçylygyndaky wekiliýet bilen duşuşyk geçirildi. Bu barada TDH habar berýär.
Taraplar saglygy goraýyş we bilim ulgamyndaky hyzmatdaşlygyň häzirki ýagdaýyny hem-de geljegini ara alyp maslahatlaşdy. Bu ugurlar boýunça iki ýurduň arasyndaky gatnaşyklaryň ösýändigi bellenildi.
Duşuşygyň netijeleri boýunça Myrat Garryýew adyndaky Türkmenistanyň Döwlet lukmançylyk uniwersiteti bilen Pekiniň hytaý lukmançylygy uniwersitetiniň arasynda Türkmen-hytaý adaty hytaý lukmançylygy merkezini döretmek barada özara düşünişmek hakynda Ähtnama gol çekildi.
Çäräniň dowamynda myhmanlara milli saglygy goraýyş ulgamyna, şol sanda türkmen topragynda ösýän dermanlyk ösümliklere, ýurduň şypahanalarynyň mümkinçiliklerine bagyşlanan sergi görkezildi. Sergide dermanlyk ösümliklerden taýýarlanan çaýlaryň dürli görnüşleri hem tanyşdyryldy.
Türkmenistanyň Halk Maslahatynyň Başlygy Gurbanguly Berdimuhamedowyň «Türkmenistanyň dermanlyk ösümlikleri» atly köp jiltli ylmy-ensiklopedik kitabyna aýratyn orun berildi.
Mundan başga-da, uniwersitetde Adaty däl lukmançylyk otagy açyldy. Dabara Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa gatnaşdy.
Dabara uniwersitetiň uly mejlisler zalynda dowam etdi. Onda ýokary okuw mekdepleriniň arasyndaky gatnaşyklary ösdürmekdäki tagallalary we tejribe alyşmak işine goşan saldamly goşandy üçin Pekiniň hytaý lukmançylygy uniwersitetiniň rektory Tan Çžişua M.Garryýew adyndaky TDLU-nyň hormatly professory diýen ady dakmak baradaky çözgüt beýan edildi.
Saparyň dowamynda hytaý lukmançylyk tejribesini, ilkinji nobatda, Türkmenistanyň dermanlyk ösümlikleri bilen utgaşdyrmak meseleleri maslahatlaşyldy. Munuň tejribe alyşmak we lukmançylykda döwrebap çemeleşmeleri ornaşdyrmak üçin täze mümkinçilikleri açýandygy nygtaldy.
