25-nji iýunda Türkmenistanyň Bilim ministrliginde Jumamyrat Gurbangeldiýewiň Yrak Respublikasynyň Türkmenistandaky Ilçihanasynyň işleri wagtlaýyn ynanylan wekili Jassim Mohammed Al-Attar bilen duşuşygy geçirildi. Bu barada ministrligiň saýtynda habar berilýär.
Söhbetdeşligiň barşynda iki döwletiň arasynda bilim, ylym we medeni-ynsanperwer ugurlarda hyzmatdaşlygy mundan beýläk-de ösdürmegiň meseleleri ara alnyp maslahatlaşyldy.
Taraplar özara dostlukly gatnaşyklary pugtalandyrmakda bilim ulgamyndaky hyzmatdaşlygyň möhüm ähmiýete eýedigini aýratyn belledi. Duşuşykda ýokary okuw mekdepleriniň arasynda özara gatnaşyklary giňeltmek, tejribe alyşmak we bilelikdäki başlangyçlary durmuşa geçirmek boýunça bar bolan mümkinçilikler barada netijeli pikir alşyldy.
Duşuşygyň ahyrynda taraplar özara bähbitli hyzmatdaşlygy dowam etdirmäge hem-de iki ýurduň bilim ulgamyndaky gatnaşyklaryny täze many-mazmun bilen baýlaşdyrmaga doly taýýardyklaryny tassyklady.
