Britaniýanyň Quacquarelli Symonds (QS) kompaniýasy dünýäniň iň gowy uniwersitetleriniň QS World University Rankings 2027 reýtingini neşir etdi. Sanawda öňdebaryjy orunlary öňküsi ýaly ABŞ-nyň we Beýik Britaniýanyň ýokary okuw mekdepleri eýeleýär, ýöne gözlegiň awtorlary Aziýanyň we Ýakyn Gündogaryň uniwersitetleriniň orunlarynyň görnetin ýokarlanandygyny belleýär.
Massaçusets tehnologiýa instituty eýýäm on bäşinji ýyl yzygiderli reýtingiň birinji ornuny saklap gelýär.
Ilkinji onlugyň düzümi geçen ýyl bilen deňeşdirilende üýtgemedi. Ikinji orny Stenford uniwersiteti bilen Londonyň Imperial kolleji paýlaşdy. Ondan soňky orunlarda bolsa Oksford uniwersiteti, Garward uniwersiteti, Kembrij uniwersiteti, Kaliforniýa tehnologiýa instituty, Sýurihiň Şweýsariýa ýokary tehniki mekdebi, Londonyň Uniwersitet kolleji we Singapuryň Milli uniwersiteti ýerleşýär.
Bu gezekki reýtinge jemi 1504 sany uniwersitet girdi. QS bu sanawy 2004-nji ýyldan bäri neşir edip gelýär we okuw mekdeplerini akademiki abraý, iş berijileriň pikiri, mugallymlaryň we talyplaryň sanynyň özara gatnaşygy, halkara hyzmatdaşlyk, daşary ýurtly talyplaryň paýy hem-de ylmy makalalara salgylanma derejesi ýaly birnäçe görkezijiler boýunça bahalandyrýar.
Analitikler ABŞ-nyň liderligini saklap galandygyna garamazdan, Aziýanyň uniwersitetleriniň barha möhüm rol oýnap başlandygyny belleýär. Ilkinji ýigrimilige Gonkong uniwersiteti, Singapuryň Nanýan tehnologiýa uniwersiteti, Pekin uniwersiteti, Sinhua uniwersiteti we Gonkongyň Hytaý uniwersiteti girdi. Hindistanyň ýokary okuw mekdepleriniň arasynda bolsa iň gowy netijäni Deliniň Hindi tehnologiýa instituty görkezip, ol 118-nji orny eýeledi.
Reýtingiň awtorlary Ýakyn Gündogaryň uniwersitetlerine aýratyn üns berdi. QS-iň maglumatlaryna görä, arap sebiti örän uly ösüş görkezdi: sebitiň öňdebaryjy dört uniwersiteti rekord netijeleri gazandy. Olaryň arasynda Saud Arabystanyndan Patyşa Fahd adyndaky nebit we minerallar uniwersiteti (63-nji orun) hem-de Patyşa Saudyň uniwersiteti (107-nji orun), Katar uniwersiteti (109-njy orun) we Birleşen Arap Emirliklerindäki Halifa uniwersiteti (147-nji orun) bar.
Analitikler bu netijeleri sebitiň ýokary okuw mekdepleriniň dünýä derejesinde bäsdeşlige ukyplylygynyň barha artýandygynyň subutnamasy diýip hasaplaýarlar.
