Tokionyň «The Shoto Museum of Art» sungat muzeýinde 10-njy aprelde gadymy türkmen milli lybaslarynyň, el işleriniň, keşdeçilik we zergärçilik önümleriniň sergisi açyldy. Çäre «Merkezi Aziýanyň el işleri» şygary astynda geçirilýär. Sergi 11-nji aprelden 14-nji iýuna çenli tomaşaçylar üçin elýeterli bolar.
Serginiň maksady Tokio şäheriniň ýaşaýjylaryny Hirosima prefekturasynyň Sungat muzeýiniň gorunda saklanýan türkmen eserleri bilen tanyşdyrmak, şeýle hem Beýik Ýüpek ýolunyň ugrunda ýerleşýän Merkezi Aziýanyň medeni mirasyny açyp görkezmekdir.
Sergide 200-e golaý kümüş şaý-sepler, milli keteni lybaslary, zenanlaryň nagyşly çyrpylary we beýleki el işleri görkezilýär.
Iňlis atşynaslary tarapyndan ýygnalan türkmen atlarynyň şaý-sepleri we esbaplary sergide aýratyn orun eýeleýär.
Bu çäre «Garaşsyz, baky Bitarap Türkmenistan — bedew batly at-myradyň mekany» ýylyna bagyşlanyp guraldy.
