Ozal habar berşimiz ýaly, 8-nji aprelde Prezident Serdar Berdimuhamedow Mary welaýatynyň Ýolöten etrabynyň Ymambaba geňeşliginde 4 müň 500 hojalyga niýetlenen täze döwrebap şäherçäniň düýbüni tutmak dabarasyna gatnaşdy. Dabara gatnaşyjylara täze şäherçe barada giňişleýin maglumat berýän wideoşekiller görkezildi.
Häzirlikçe ady goýulmadyk bu şäherçe Türkmenistanyň Gurluşyk we binagärlik ministrligi tarapyndan gurlar. Onuň esasy görkezijileri:
- meýdany 800 gektardan gowrak;
- 4 müň 500 sany ýaşaýyş jaýy;
- 22 müň 500-den gowrak ýaşaýja niýetlenýär.
Şäherçede ýaşamak üçin ähli şertler dörediler. Şunlukda, aşakdaky desgalary gurmak meýilleşdirilýär:
- Geňeşligiň edara binasy;
- 720 orunlyk 6 sany orta mekdep;
- 320 orunlyk 8 sany çagalar bagy;
- söwda merkezi;
- döwrebap hassahana;
- 2 sany ýangyn howpsuzlyk bölümi;
- 500 orunlyk Medeniýet öýi;
- 500 orunlyk Toý mekany;
- 1000 orunlyk metjit.
Şeýle hem obada häzirkizaman ýaşaýyş-durmuş ulgamlary ornaşdyrylar. Kuwwaty 15 müň kub metr bolan suw arassalaýjy desga, 10 müň kub metr bolan lagym arassalaýjy desga we iki sany kuwwatly elektrik bekedi gurlar.
Döwlet Baştutany dabarada çykyş edip, ýurtda döwrebap ilatly ýerleriň we dürli maksatly desgalaryň gurluşygynyň dowam etdirilýändigini belledi.
«Geçen ýyl Ahal welaýatynyň Ak bugdaý etrabynda Döwletli mekan, Kaka etrabynda Bagtly zamana obalarynyň, Daşoguz welaýatynyň Köneürgenç etrabynda Bitaraplyk şäherçesiniň açylmagy halkymyz üçin uly sowgat boldy» – diýip, döwlet Baştutany nygtady. Ol raýatlary oňaýly ýaşaýyş jaýlary bilen üpjün etmegiň döwlet syýasatynyň ileri tutulýan ugurlarynyň biri bolup galýandygyny aýtdy.
Dabaranyň dowamynda döwlet Baştutany ýadygärlik ýazgyly gutujygy we ilkinji beton garyndysyny binanyň düýbüne atdy.
