2026-njy ýylyň 31-nji martynda Owganystanyň Balh welaýatynyň Mazary-Şarif şäherinde türkmen halkynyň akyldar şahyry Magtymguly Pyragynyň ýadygärligi abatlaýyş işlerinden soň dabaraly ýagdaýda açyldy.
Türkmenistanyň Daşary işler ministrliginiň habar bermegine görä, ýadygärligiň abatlaýyş işleri «Akýol» jemgyýetçilik we medeniýet guramasynyň başlygy Hajy Mohammad Haşim Wali Zadanyň başlangyjy hem-de Owganystanda ýaşaýan türkmenleriň maliýe goldawy bilen amala aşyryldy.
Dabaraly çärä türkmen diasporasynyň wekilleri, Mazary-Şarif şäheriniň häkimi Abdul Rahman Hemmet, Owganystanyň DIM-iniň Balh welaýatyndaky wekilhanasynyň ýolbaşçysy Möwlewi Aminuallah Sadyk, şeýle hem Türkmenistanyň Baş konsullygynyň işgärleri, din alymlary we medeniýet işgärleri gatnaşdy.
Çykyş edenler Magtymguly Pyragynyň edebi mirasynyň diňe bir türkmen halky üçin däl, eýsem tutuş dünýä medeniýeti we ýaş nesli milli ruhda terbiýelemek üçin uly ähmiýete eýedigini aýratyn nygtady.
