Türkmenistanyň Prezidenti Serdar Berdimuhamedow elektroenergetika pudagynyň maddy-enjamlaýyn binýadyny döwrebaplaşdyrmak baradaky teklibi makullady. Bu barada 27-nji martda sanly ulgam arkaly geçirilen Hökümet mejlisiniň jemleri boýunça «Watan» habarlar gepleşiginde mälim edildi.
Elektrik energetika ulgamyny ösdürmek boýunça alnyp barylýan işler barada wise-premýer B.Annamämmedow hasabat berdi. Onuň aýtmagyna görä, häzirki wagtda içerki sarp edijileri elektrik energiýasy bilen ygtybarly we bökdençsiz üpjün etmek, şeýle hem onuň eksport edilýän möçberini artdyrmak üçin çäreler görülýär. Desgalaryň durnukly işlemegini üpjün etmek maksady bilen, pudagyň kärhanalarynyň maddy-enjamlaýyn binýadyny döwrebaplaşdyrmaga aýratyn üns berilýär.
Şunuň bilen baglylykda, wise-premýer döwlet Baştutanynyň garamagyna degişli teklibi hödürledi.
Prezident Serdar Berdimuhamedow hasabaty diňläp, ýurtda elektrik energiýasyna bolan içerki islegleri kanagatlandyrmak we eksport möçberlerini artdyrmak boýunça netijeli işleriň alnyp barylýandygyny belledi. Döwlet Baştutany döwlet elektrik stansiýalarynyň işini döwrebap ýola goýmak maksady bilen taýýarlanan teklibi goldady we wise-premýere degişli işleriň ýerine ýetirilmegini guramagy tabşyrdy.
