Türkmenistanyň Prezidenti Serdar Berdimuhamedow «Türkmengeologiýa» döwlet korporasiýasynyň maddy-tehniki binýadyny döwrebaplaşdyrmak baradaky teklibi makullady. Bu barada 27-nji martda «Watan» habarlar gepleşiginde mälim edildi.
Degişli karar döwlet Baştutanynyň sanly ulgam arkaly geçiren Ministrler Kabinetiniň nobatdaky mejlisinde kabul edildi.
Hasabat bilen çykyş eden wise-premýer G.Agajanow döwlet korporasiýasynyň hünärmenleri tarapyndan geçirilýän gözleg-barlag işleriniň netijeliligini ýokarlandyrmak boýunça görülýän çäreler barada aýtdy.
Bellenilip geçilişi ýaly, türkmen geologlary ýerasty baýlyklary ýüze çykarmak, döwrebap enjamlary ulanmak arkaly seýsmiki barlaglary geçirmek, şeýle hem uglewodorod çig mal binýadyny artdyrmak boýunça işleri alyp barýar. Şunuň bilen bir hatarda, bu işleriň netijeliligini ýokarlandyrmak üçin korporasiýanyň maddy-enjamlaýyn binýadyny döwrebaplaşdyrmak boýunça çäreler görülýär.
Şunuň bilen baglylykda, wise-premýer degişli teklibi Prezidentiň garamagyna hödürledi.
Serdar Berdimuhamedow hasabaty diňläp, ýurtda ýerasty baýlyklary ýüze çykarmak we özleşdirmek boýunça netijeli işleriň alnyp barylýandygyny belledi. Döwlet Baştutany geologiýa-gözleg işleriniň netijeliligini ýokarlandyrmak maksady bilen taýýarlanan teklibi makullady we wise-premýere bu ugurda zerur çäreleriň geçirilmegini üpjün etmegi tabşyrdy.
